10-03-2010

“Imponi il nestri zûc al Palermo”

Juan Cuadrado: “Atenzion a Miccoli: al è il zuiadôr plui pericolôs jenfri i rose e neris. Pericolôs lassâi libertât di azion”

Juan Guillermo Cuadrado al è rivât a Udin chest Istât in ponte di pîts de Colombie. Plan a plan al è daûr a vuadagnâsi un spazi simpri plui grant e, daspò de buine prestazion cuintri dal Inter, al à zuiât une altre volte a Bergamo tai undis di partence: “Mi soi plasût di plui cuintri de prime in classifiche, ma ogni partide e je difarente. Cuintri de Atalante o ai vût plui dificoltâts, par chest o ai di cressi e miorâ ancjemò. Il Mister al è simpri prodic di conseis cun me”.

Il Palermo di Delio Rossi al à vuadagnât 9 ponts tes ultimis trê garis e al rive di une serie di vot vitoriis in cjase. No son mancjâts nancje i blitz lontan dal “Barbera”. A paiâ il dazi ai rose e neris, sore che il Livorno, dôs vitimis famosis: Milan e Juventus. “O savìn che a vivin un bon moment e che a son une biele scuadre, nô però o vin la esigjence di concuistâ i trê ponts par jessî de zone cjalde de classifiche. Par rivâi o vin di imponi il nestri zûc e o podìn fâje parcè che o sin une scuadre une vore unide e fuarte in ducj i reparts: atac, difese e centricjamp”.

A Udin il pericul numar un al sarà Fabrizio Miccoli, za a segn 10 voltis in chest campionât: “Il salentin al è un atacant pardabon valit e di grande cualitât. Al sa jessi simpri pericolôs: no varìn di lassâi libertât di azion”.

I contignûts si puedin riprodusi citant la font udinese.it