12-03-2010

“Jentrâ in partide mieze ore prime che e scomenci”

Aleksander Lukovic al bute la sfide ai rose e neris: “Lôr a scombatin pe Champions e a son la scuadre plui in forme dal moment, ma a nô nus interessin dome i trê ponts. O fasarìn 95 minûts di grant Udin”

Il difensôr serp al analize il prossim aversari dai furlans, il Palermo di Delio Rossi: “In chest moment in Italie e je la scuadre plui in forme, ma nô o volìn chescj trê ponts plui di ogni altre robe. A àn zuiadôrs di grande cualitât, mi vegnin tal cjâf Miccoli, Cavani, Pastore… E sarà une altre partide rispiet a chê de prime metât di campionât parcè che i obietîfs cumò a son difarents. Lôr a scombatin par cualificâsi in Champions League, nô pe salvece. I sicilians no vignaran dal sigûr achì par contentâsi di un pont, a volaran vinci. O crôt che e saltarà fûr une biele partide”.

Il snait al varà di jessi chel just fin dai prins minûts: “O varìn di jentrâ in partide mieze ore prime che e scomenci e zuiâ 95 minûts di grant Udin, concentrâts e triscj cence lassâ spazis ai nestris aversaris. Lin indevant su cheste strade e i risultâts a rivaran, nus covente dome miorâ la concentrazion. L’obietîf al è rivâ ai 40 ponts prime pussibil”.

Cul svicinâsi dai Mondiâi, Lukovic al fâs un belanç personâl di cheste prime part de stagjon: “O sai che o pues fâ e o ai di fâ di plui pai colôrs blancs e neris. No soi content di cemût che o ai zuiât fin cumò. La posizion in cjamp e à une impuartance relative, o pues zuiâ sedi di tiercin che di centrâl, no ai preferencis sul rûl dulà che o ven doprât dal Mister”.

La sfide te sfide e sarà Di Natale-Miccoli: “A son doi zuiadôrs fuartonons, ma jo o sielç Totò: chest an al à za fat 19 goi”.

I contignûts si puedin riprodusi citant la font udinese.it