La nassite dal Acciù | I agns '30 e '40 | Di Bertoli a Bruseschi | Dal '55 a Brunello | Di Sanson ai agns '80 | Al rive il re Zico | La aventure di Gianpaolo Pozzo | Il model che al ispire

Il model che al ispire

LA SOCIETÂT BLANCJE E NERE MODEL CHE AL ISPIRE

Gianpaolo Pozzo tal Jugn dal 1995 al da fiducie a Alberto Zaccheroni. Une fiducie dade ben. Cul tecnic romagnûl a rivin i grancj risultâts, ma si à di dâ at ae societât, ae famee Pozzo di vê lavorât sul marcjât in maniere svelte e scaltre, vuardantsi des spesis matis, pontant su campions che no vevin vût mût di mostrâsi e sui zovins. Une politiche che e paie, ce no.
L'acuist di Oliver Bierhoff al è un esempli di cemût che e lavore la societât, de sô competence. Il prin an de gjestion Zaccheroni al è bon, la scuadre si salve in anticip. Dal an daspò, 1996-97, l’Udin al cambie vele.
Il so zûc al è jenfri i miôr, la societât e imbrucje altris acuiscj, al rive un ciert Marcio Amoroso, scartât dai grancj club. Zaccheroni al inizi nol da fiducie al brasilian, po dopo si convinç che l'atacant al è un vêr campion e al nas il tiercet des maraveis cun Poggi e Bierhoff. Soredut al nas l'Udin cu la difese a trê: gare dai 13 di Avrîl dal 1997 a Turin cu la Juventus e vinçude par 3 a 0. Al sucêt che tai prins minûts il difensôr Genaux al piert il cjâf e si fâs butâ fûr. Zaccheroni nol cambie nuie, al lasse la difese cence di un om, ven a stâi a trê, ae fin al è un trionf. Soredut in Jugn e ven centrade pe prime volte la cualificazion in Uefa.

L'an daspò si siere la"ere Zaccheroni" cuntun straordenari tierç puest, cun Bierfoff capocanonîr cun 27 rêts. E je ancjemò Uefa. I Pozzo e agjissin sul marcjât cun grande maestrie, cun inteligjence, a comprin a un e a vendin a dîs, l'Udin al devente il re des plusvalencis. Il belanç al è san tant che un rôl, lis venditis inevitabilis di Bierhoff e Helveg al Milan no indebolissin la scuadre. Insome l’Udin si fâs cognossi tal mont dal balon talian par cemût che e opere sul marcjât, par cemût che e je organizade, par cemût che e scuvierç i campions ancjemò no cognossûts in dut il mont. La societât furlane e devente un model che al ispire ducj, ancje i grancj club.
L'an daspò, cun Guidolin, e je ancjemò Uefa, daspò di vê vinçût la dispate cu la Juventus par jentrâ in Europe. Guidolin, però, nol ven confermât, in Lui Gianpaolo Pozzo al comuniche che la scuadre e sarà alenade di Luigi De Canio.
Intant Amoroso al è stât vendût par tant aur che al pese al Parme e di chel stes acuardi al rive tant che controcambi parziâl Stefano Fiore, un altri campion ancjemò no cognossût che a Udin al devente un as.
La scuadre par trê cuarts di campionât si compuarte ben, po dopo e va in crisi ancje parcè che magari cussì no e piert par infortuni il miôr Jorgensen. I blancs e neris a finissin il campionât al setim puest.
Nuie Uefa, ma al è il repeç dal Intertoto dulà che i blancs e neris a zuin e a vincin. E je ancjemò Uefa.
Tal 2000-01 la scuade e partìs daurman di grande cariere, dopo cinc zornadis e je prime cun tredis ponts. Cualchidun al scomence a fevelâ di scudet, cualchidun altri si spiele tai risultâts vuadagnâts, ae fin i pecjâts di vanitât a saran paiâts une vore cjârs. La scuadre e va in crisi te seconde metât di Març dal 2001, daspò de sconfite in cjase cul Parme al ven esonerât De Canio e sostituît di Luciano Spalletti. La scuadre non si ricjape, par fortune te penultime zornade e vinç a Bergamo par 1 a 0 cu la rêt di Muzzi e e reste in A.
Pozzo al lasse Spalletti, pûr preseant il so lavôr, par tignî une promesse fate cualchi mês prin a Roy Hodgson, ex alenadôre dal Inter. Al è proprit l’inglês a alenâ l’Udin tal torneu 2001-02, ma al fâs fature a ambientâsi, ancje se il so lavôr nol è po cussì mâl come che al podarès fâ pensâ il fat che i àn dât il sac. L’Udin al è il protagonist di un percors dut un alt e bas, ma ae vilie di Udin-Verone, Gianpaolo Pozzo si ofint par une interviste di Hodgson suntun cuotidian inglês dulà che al dîs di jessi pintût par vê sielt l’Udin. Al è il lamp che al fâs sclopâ il ton, Hodgson al ven mandât vie ae fin de sfide cui veronês, al so puest al ven clamât Giampiero Ventura. Ma i risultâts, no dome no van in miôr, ma in piês e l’Udin che Ventura al veve cjapât sù in otave posizion, si salve al penultin turni vincint a Lecce par 2 a 1 cun doplete di Di Michele.

I TRÊ AGNS DI SPALLETTI
Scjuvît l’enesim pericul, l’Udin si riabilite in gracie de tornade dal tecnic toscan. Cun Spalletti, cun daûr une societât organizade, cun acuiscj intivâts di bande dai Pozzo, l’Udin al svuale, par trê agns al concuiste la Europe (dôs voltis Uefa e, la storie si fâs resinte, ae fin de stagjon 2004-05 al ven concuistât il pass pe manifestazion continentâl plui prestigjose).
A Spalletti si scuen dâi il merit di vê lançât cun sucès i zovins Muntari e Felipe, di vê judât la esplosion di Pizarro, rivât in Italie tal Lui dal 1999 e di Iaquinta, cence dismenteâsi dal exploit di Di Michele.
Cun Spalletti l’Udin al zuie il balon plui biel, concret, crût, organizât e ancje spetacolâr. La scuadre e va simpri al atac, e sa jessi ecuilibrade e chest al spieghe parcè che e à cjapât mancul rêts dal passât.
Subit daspò de fin de ultime gare di campionât, chê cul Milan (1 a 1 e che e vâl la partecipazion ai preliminârs di Champions), Spalletti al fâs capî che nol intint plui restâ. Nûf dîs daspò dal trionf, il tecnic di Certaldo al da lis dimissions (al inizi congjeladis), po dopo al cjate une soluzion cu la societât par lâ vie in maniere "indolôr".
Al so puest al rive Serse Cosmi, 47 agns, de Umbrie, ex Arezzo, ex Perugia, ex Gjenue. Il tecnic nol à fortune.
La sô aventure e partìs ben, l’Udin tal pre campionât al bat formazions di alt livel, al mostre une maniere di zuiâ autentiche. Po dopo al puarte insom la imprese di superâ l’ostacul dai preliminârs par partecipâ ae Champions League, batint dôs voltis il Sporting Lisbona, finalist cuatri mês prime in Uefa e al rive ae manifestazion continentâl plui prestigjose.
Tal prin turni di Champions al Udin i tocjin Barcelone, Werder Brema, Panathinaikos.
I blancs e neris a sierin il turni al tierç puest, ancje se la delusion e je grande, par vê mancjât il secont puest daspò de sconfite in cjase dal Barcelone. Al sarès bastât il risultât di paritât par centrâ l’obietîf, cun di plui a 5’ de fin al jere ancjemò 0 a 0.
Po dopo l’Udin al va in crisi, al vinç pôc, ancje se il sucès dai 21 di Dicembar dal 2005 a spesis de Sampdorie, al ilût ducj. L’inizi dal 2006 al tache sot de crisi e la sconfite in cjase cu la Reggina (1-2) e je fatâl par Cosmi che al ven esonerât. Lu sostituìs Loris Dominissini cun Sensini tant che colaboradôr tecnic.
La soluzion tecniche e cjate il bon acet de place. Dominissini, ex blanc e neri ai timps di Zico, al è furlan al 100%, Sensini al è il mît. La aventure dai doi e tache ben, l’Udin al impate a Rome cuintri de Lazio (tal anticip serâl di sabide ai 11) par 1 a 1, i blancs e neris a dan la impression di jessi tornâts a nassi come zûc e di cjâf. Joibe ai 15 si esaltin in Uefa molant trê papinis ai francês dal Lens. La place e gjonde, convinte di vê tornât a cjatâ une scuadre vere. Ma e je une ilusion. Vot dîs dopo l’Udin al piert in cjase cul Siena par 2 a 1, ai 23 di Fevrâr al piert ancje te seconde gare cul Lens, 1 a 0, ma e passe il turni. In campionât i oms di Dominissini e Sensini si preparin a zuiâ a Milan cuintri dal Inter, e finìs 1 a 3. Tal turni dopo si zonte ancje la sfortune a fermâ l’Udin, te gare in cjase cul Ascoli, zuiade suntun teren ai limits pe ploie colade prime e vie pal match, al 32’ dal secont timp Di Natale al cjate il jolly, cuntune sgarmetade di campion al segne il gol che al podarès dâ il sucès-rilanç dal Udin. Ma nol è cussì, al 44’ Domizzi si bute in aree cence jessi stât tocjât di Defendi e l’arbitri Rosetti al cole te vuate: rigôr che il stes Domizzi al trasforme.

La joibe daspò l’Udin al è impegnât te prime gare dai otâfs di Uefa cuintri dal Levski. L’aversari al somee facil di frontâ, in realtât la scuadre bulgare e rêç ben e e finìs 0 a 0, invezit la domenie daspò in campionât i blancs e neris a colin a Palermo cundut che a vevin zuiât ben tal prin timp. E finìs 2 a 0 pai sicilians che a profitin pal miôr doi erôrs de difese dal aversari. La situazion e cole jù, ancje se l’Udin al reste simpri ae juste distance dal precipizi de retrocession, ma plui che la classifiche al fâs pôre il stât di salût mentâl dai blancs e neris che al somee che a vein pôre di ducj. Te seconde gare in Bulgarie a pierdin par 2 a 1 cuintri dal Levski e a son parâts fûr de Uefa, ma il piês al à ancjemò di rivâ: domenie ai 19 di Març il Milan al vinç al “Friuli” cuntun sfuarç minim, cuntun perentori 4 a 0. 

AL TORNE GALEONE
La scuadre e je in confusion, la crisi e va in piês, al pâr che no si puedi tornâ indaûr. Sensini la dì dopo al da lis dimissions, al va vie ancje Dominissini, Gianpaolo Pozzo, par cirî di salvâ il salvabil, al da l’Udin aes mans espertis dal alenadôr psicolic Giovanni Galeone autôr de promozion in A dai blancs e neris te stagjon 1994-95. La sielte, a dispiet dal seticisim di cualchi critic e di bande dai tifôs, e je intivade.
Galeone al met a gnûf il cjâf dal grup, al fâs cualchi modifiche tatiche, la difese a trê e passe a cuatri, centricjamp e atac a son a trê, a Candela i ven dât il rûl di regjist. I risultâts dal gnûf lavôr si viodin za in Cope Italie la dì dopo cul Udin che, ancje se al piert par 1 a 0 a Milan cuintri dal Inter al zuie miôr e la sconfite e à il savôr de burlade.

La domenie daspò a Messina, intun match che al sa di dispate – salvece, l’Udin al da un altri segnâl clâr che la cure di cjaval di Galeone e prodûs bogns efiets benefici. La gare e finìs 1 a 1 cui blancs e neris che a àn corût pôcs pericui. La opare mestre di Galeone si fâs tes trê garis daspò, dutis vinçudis, 2 a 0 in cjase cul Parme, 2 a 0 a Livorno, 2 a 1 a Lecce.
Si salvin dal pericul, la scuadre e je salve nancje dopo di un mês che cualchidun le veve considerade “aromai cuete”. Po dopo i blancs e neris a impatin in cjase cul Chievo, 1 a 1, a otegnin il stes risultât a Gjenue, a batin al “Friuli” il Cagliari par 2 a 0, si inçopedin te ultime zornade a Trevîs, 1 a 2, ma si scuen dî che in chê partide, daspò dal provisori 1 a 0 a restin in dîs pe espulsion di Muntari. Il consuntîf di Galeone al è brilant, cuindis ponts in vot garis, une medie di scuadre in stât di rivâ al tierç, cuart puest, ven a stâi in Champions League.
Il Gale al ven confermât ancje pe stagjon 2006-07.
E je fiducie tal gnûf Udin fat di elements impuartants, Zapata, Felipe, De Sanctis, Pinzi, Obodo, Muntari, Iaquinta, Di Natale dome par fâ cualchi non e l'inizi dal campionât, a dispiet dal no spietât 0 a 1 di Messine al prin turni, al è dal sigûr positîf. Par doi mês i blancs e neris a imponin il lôr zûc, a imponin ancje il 0 a 0 al Inter cundut che a zuin cuntune formazion une vore cambiade. Po dopo alc al tache a no funzionâ, il mecanisim di zûc si imberdee, la scuadre e piert posizions e ae fine de prime metât di campionât, daspò dal 0 a 2 di Palermo, Gianpaolo Pozzo al esonere Giovanni Galeone e al clame Alberto Malesani. L'ex tecnic dal Panathinaikos, al cambie ancje il modul, il 4-3-3 al ven metût in bande a pro dal 3-5-2, il gnûf scheme di bataie al pâr dâ i risultâts spietâts, l'Udin si svee, al bat in cjase il Messine, al vinç a Turin, par po tornâ a colâ tai stes erôrs.
In Avrîl Malesani al piert ancje un element impuartant, Obodo, par un infortuni grâf al zenoli di drete, e adun cul centricjampist ancje il bus pe Europe. A son fondamentâls lis sconfitis in cjase cul Catanie di Marino, cu la Atalante e cul Palermo ae ultime zornade. Pozzo, daspò de delusion, al decît di zirâ pagjine dopo de stagjon deludente, al vent i zuiadôrs che a Udin a àn dât dut, Muntari e Iaquinta su ducj e al clame un gnûf alenadôr, Pasquale Marino grant autôr de salvece dal Catanie. La scuadre si rinzovanìs, a rivin Eremenko pe fin dal prestit al Siena, Boudiasnki de Juventus, Inler dal Zurigo, Floro Flores dal Arezzo, soredut al ven centrât un colp pardabon impuartant, Fabio Quagliarella che l'Udin al puarte vie ae Sampdoria ae bustis.
L'inizi dal torneu 2007-08 al fâs sperâ ben, 1 a 1 sul cjamp dai Campions di Italie dal Inter che al cree un entusiasim gnûf; po il turni daspò e rive la glaçadure, l'Udin al ven cjapât sot in cjase dal Napoli par 5 a 0 e Marino al cambie modul: il 3-4-3 al cjape il puest dal 4-3-3 dal principi.
La sielte e je intivade e l'Udin al impon il so zûc, la fuarce dai siei zuiadôrs, in curt e rive tai puescj alts de classifiche.

<--